बिर्तामाेड । भारतबाट कारमा फल्स बटम बनाएर मदिरा भित्र्याउदै गर्दा काँकडभिट्टाबाट एकजना भारतीय नागरिक पक्राउ परेका छन् । 

बीआर २२ एफ ५०५१ नम्बरकाे कारमा फल्स बटम बनाएर नेपालतर्फ मदिरा भित्र्याउने भारतीय नागरिकलाई पक्राउ गरेकाे जिल्ला प्रहरी कार्यालय झापाले जनाएकाे छ । पक्राउ पर्नेमा कार चालक जितेन्द्र कुमार पासवान रहेका छन् । 

मेचीनगर नगरपालिका-६ भन्सार गेट अगाडिबाट उनलाई नियन्त्रणमा लिएकाे झापाका प्रहरी प्रवक्ता कृष्णकुमार चन्दले जानकारी दिएका छन् । कारकाे डिकी लगायत अन्य स्थानमा २५४ बाेतल ब्ल्याक माउण्टेन विस्की, सुपर स्ट्रङ बियर २४ बाेतलसमेत बरामद गरेकाे प्रहरीले जनाएकाे छ । 

प्रहरीले बरामद मदिराकाे १ लाख  ९८ हजार ९ सय र कारकाे ७ लाखसमेत मुल्य राखेर ८ लाख ९८ हजार ९ सय रुपैयाँ मुल्य ताेकेर भन्सारमा बुझाएकाे जनाएकाे छ ।